Galego | Castellano | English

CGAC
Horario: aberto de 11 a 20 h
Entrada gratuíta
Luns pechado
Síguenos en:
Facebook Twitter Youtube Vimeo Instagram rss
CURSO CINEMA. A ORIXE DO SÉCULO XXI. TRANSFORMACIÓN DA IMAXE E DO CINEMA CONTEMPORÁNEOS (1990-2010)

28 outubro 2015 - 11 maio 2016

CURSO CINEMA. A ORIXE DO SÉCULO XXI. TRANSFORMACIÓN DA IMAXE E DO CINEMA CONTEMPORÁNEOS (1990-2010)

A chegada do século XXI non só non supuxo a enésima morte do cinema senón que inaugurou a última (polo de agora) das súas moitas vidas. Unha nova etapa de apaixonantes transformacións non só tecnolóxicas (cinema dixital, 3D, distribución por Internet...) senón tamén xeográficas (eclosión de Asia, da América latina ou dos países do Leste), de cambios no propio estatuto das imaxes (imaxe dixital fronte a imaxe fílmica) ou na súa imparable expansión cara a outras pantallas (computadores ou dispositivos portátiles pero tamén museos ou galerías de arte).

Este curso propón un amplo percorrido polo cambiante mundo da imaxe e do cinema das dúas últimas décadas —nas que o cinematógrafo, ademais, cumpriu os seus primeiros cen anos— e as súas transformacións estéticas, narrativas, tecnolóxicas ou políticas. E faino sen perder de vista nin a súa historia nin os seus referentes: do cinema clásico á modernidade pasando polo Novo Hollywood dos anos setenta ou o cinema experimental; e sen pecharse a unha concepción máis ampla da imaxe en movemento, incorporando as series de televisión, a videoarte, o videoclip ou Internet como formas (ou medios) equiparables na iconosfera contemporánea. Tratarase de ofrecer unha perspectiva o máis ampla e amena posible combinando sesións transversais con outras monográficas dedicadas a destacados cineastas (Abbas Kiarostami, David Lynch, Wong Kar-wai, Hou Hsiao- hsien, Michael Mann, Takeshi Kitano ou David Fincher) e en todas elas será primordial o uso de proxeccións de escenas e a análise de películas representativas das vibrantes transformacións destas dúas décadas.

Folleto do curso


HORARIO
: mércores de 19 a 20.30 h

PROGRAMA

28 outubro: A orixe de todos os séculos: unha (posible) introdución a dúas décadas convulsas
4 novembro: O camiño interior: O club da loita e a herdanza romántica
11 novembro: Estradas perdidas da mente: as películas- quebracabezas de David Lynch
18 novembro: (Neo)realismo: Abbas Kiarostami e a nova onda iraniana
25 novembro: Deflacións narrativas: cara a un cinema mínimo do silencio e a soidade
9 decembro: Asia I. Takeshi Kitano e Naomi Kawase: escrituras do baleiro
16 decembro: Do haluro de prata ao píxel: a senda dixital do cinema contemporáneo
13 xaneiro: Grávao todo! Novas pantallas, novas narrativas
20 xaneiro: Os ollos sen rostro: o esvaecemento do corpo do actor no cinema contemporáneo
27 xaneiro: Formas da non ficción: do cinema documental ao cinema-ensaio
3 febreiro: O cinema dentro do cinema (e a televisión dentro da televisión)
10 febreiro: Imaxes da ausencia, ausencia de imaxes: cinema e holocausto
17 febreiro: Asia II. Hou Hsiao-hsien e Wong Kar-wai: formas da melancolía
24 febreiro: Cinema e museo: dúas marxes da imaxe contemporánea
2 marzo: Steve McQueen e os abismos do corpo
16 marzo: It’s a COPY and it’s RIGHT: reapropiacións e remix
30 marzo: USA XXI: a xeración norteamericana do cambio de século
6 abril: Do crepúsculo á aurora: o western contemporáneo
13 abril: Centauros da cidade: Michael Mann e o neothriller
20 abril: “Todo está no xogo”: The Wire e a serialidade televisiva
27 abril: Adeus ás risas enlatadas: a comedia televisiva ábrese ao real
11maio: Fantasías animadas de onte e hoxe: de Max Fleischer a Jan Svankmajer
25 maio: Cando o director (de videoclips) era a estrela: Spike Jonze, Michel Gondry e Chris Cunningham

José Manuel López (Vigo, 1974) é licenciado en Publicidade e Relacións Públicas e doutorando en Comunicación pola Universidade de Santiago. En 2004 funda a revista en liña de cinema Tren de sombras e actualmente forma parte do consello de redacción da revista Caimán Cuadernos de Cine (anteriormente coñecida como Cahiers du cinéma. España). En 2011 e 2012 traballou como dialoguista na cuarta e quinta tempadas de Matalobos, serie de ficción que a produtora Voz Audiovisual desenvolveu para Televisión de Galicia. Colabora desde 2012 co MARCO de Vigo e desde 2014 co CGAC de Santiago como docente de cursos de cinema e participou en seminarios e impartiu charlas en diferentes lugares de España. En 2008 editou o libro Naomi Kawase. El cine en el umbral para o Festival Internacional de Cine de Las Palmas de Gran Canaria. Participou ademais en publicaciones colectivas como La Risa Oblicua. Tangentes, paralelismos e intersecciones entre documental y humor (Documenta Madrid), Elegías íntimas. El cine visto por los cineastas (Documenta Madrid), Un extraño entre nosotros. Las aventuras y utopías de José Luis Borau (Filmoteca de Extremadura) ou Paul Schrader. El cineasta frente a los tiempos (Seminci. Festival de Cine de Valladolid). Colabora tamén noutras revistas especializadas como Secuencias, Transit, Blogs&Docs ou Nosferatu e con editoras de DVD como Intermedio ou Cameo.


DIRECCIÓN: José Manuel López

COORDINACIÓN: Virginia Villar

DESTINATARIOS: Profesores, estudantes e todas as persoas interesadas no tema proposto.

PRAZAS: 250

INSCRICIÓN: O prazo de inscrición estará aberto desde o 24 de setembro até o 28 de outubro de 2015.
As persoas interesadas poden inscribirse enviando un correo electrónico a cgac.educacion@xunta.es no que deben indicar o seu nome completo, estudos, área de traballo ou interese, un enderezo de correo electrónico e un teléfono de contacto. Unha vez aceptada a solicitude, informarase as persoas inscritas sobre como realizar o pago.

MATRÍCULA: 80 € / Prezo para socios do Cineclube Compostela: 65 €

CERTIFICACIÓN: Está a tramitarse a solicitude dun crédito universitario para o alumnado matriculado en calquera título de grao da Universidade de Santiago de Compostela (USC) e o recoñecemento como formación permanente do profesorado (34 horas) pola Consellería de Cultura, Educación e Ordenación Universitaria.
No caso de que sexan concedidos, as persoas interesadas en obter o crédito e o certificado de aproveitamento do curso deberán asistir, como mínimo, ao 85% das sesións.
Rúa Valle Inclán, 2
15703 Santiago de Compostela
España
Tel.: (+34) 981 546 619
Fax: (+34) 981 546 625
cgac.xunta.gal