Galego | Castellano | English

CGAC
Horario: aberto de 11 a 20 h
Entrada gratuíta

Luns pechado 


Síguenos en:
Facebook Twitter Youtube Instagram rss

VISITAS GUIADAS

CON CITA PREVIA

De setembro a xuño

O CGAC ofrece visitas guiadas gratuítas ás súas exposicións temporais de martes a venres de 11:00 a 13:00 horas. Este servizo ten como finalidade estimular o interese pola creación artística contemporánea e facilitar a comunicación entre o espectador e as obras de arte.

No caso dos grupos escolares dos ciclos de educación infantil e de primaria, o persoal do Departamento de Actividades e Educación deseña, ademais, talleres didácticos específicos para complementar a visita ás mostras artísticas.

Duración aproximada das visitas:

Ciclo de educación infantil. Visita-taller: 60 minutos
Ciclo de educación primaria. Visita-taller: 90 minutos
Ciclo de educación secundaria, bacharelato e adultos: 50 minutos

Calquera colectivo que o desexe pode solicitar unha visita guiada escribindo unha mensaxe electrónica a cgac.pedagogia@xunta.gal . O correo deberá conter a seguinte información: o nome do centro ou a persoa que formula a solicitude, o número de persoas de que consta o grupo, a súa idade e nivel de formación, o día e a hora en que desexan realizar a visita, un número de teléfono e un enderezo de correo electrónico.


O número de prazas por visita, a súa duración e a posibilidade de realizar talleres didácticos pode variar en función das medidas derivadas da COVID-19. 
 
VISITAS DIDÁCTICAS EN LIÑA UN ACHEGAMENTO Á ARTE CONTEMPORÁNEA: O CGAC E A SÚA COLECCIÓN

De setembro 2020 a xuño 2021 

Durante as sesións realizaremos unha presentación con imaxes dos diferentes espazos, montaxes e exposicións históricas do CGAC exemplificando a través dos múltiples soportes, miradas e discursos das obras da Colección CGAC os diversos xeitos de facer da arte actual.

O obxectivo deste servizo é achegar á arte aos centros educativos e estimular o interese das novas xeracións pola creación artística do seu tempo.

DESTINATARIOS

Cursos de ESO e Bacharelato

DURACIÓN APROXIMADA

60 minutos

REQUISITOS TÉCNICOS

O centro educativo deberá dispor do equipo técnico preciso para participar nunha reunión telemática (aula equipada cun ordenador con cámara e micro, altofalantes e pantalla). 

SOLICITUDE

A actividade é de balde e para participar é preciso que os centros interesados envíen unha mensaxe electrónica a cgac.educacion@xunta.gal coa seguinte información: nome do centro educativo, curso ou idade dos participantes, día e hora en que desexan realizar a sesión, un número de teléfono e un enderezo electrónico de contacto e mais o nome da persoa responsable.

Unha vez aceptada a solicitude os centros recibirán as indicacións precisas para accederen á sesión en liña

.

SESIÓNS DIDÁCTICAS EN LÍÑA. DESCUBRINDO A ARTE CONTEMPORÁNEA

De setembro a xuño

Nestas sesións didácticas realizaremos unha presentación con imaxes de diferentes obras de arte contemporáneas deténdonos na diversidade de soportes, materias, discursos, miradas e posibilidades expresivas e experimentais da arte actual. Combinaremos a mostra de imaxes con dinámicas creativas dirixidas ao alumnado.

O obxectivo desta actividade é achegar a arte aos centros educativos e estimular o interese das novas xeracións na creación artística do seu tempo.  

DESTINATARIOS 

Cursos de Educación Primaria

DURACIÓN APROXIMADA

50 minutos

REQUISITOS TÉCNICOS

O centro educativo deberá dispor do equipo técnico preciso para participar nunha reunión telemática (aula equipada cun ordenador con cámara e micro, altofalantes e pantalla). 

SOLICITUDE

A actividade é de balde e para participar é preciso que os centros interesados envíen unha mensaxe electrónica a cgac.educacion@xunta.gal coa seguinte información: nome do centro educativo, curso ou idade dos participantes, día e hora en que desexan realizar a sesión, un número de teléfono e un enderezo electrónico de contacto e mais o nome da persoa responsable.

Unha vez aceptada a solicitude os centros recibirán as indicacións precisas para accederen á sesión en liña



SEN CITA PREVIA 

Durante todo o ano

VISITAS GUIADAS FIN DE SEMANA

Visitas guiadas á arquitectura e á historia do CGAC

O primeiro sábado de cada mes organizamos unha visita arredor da arquitectura e a historia do CGAC.

Durante o transcurso destas visitas falarase do deseño de Álvaro Siza Vieira e da súa estreita relación formal e conceptual co parque de Bonaval e coa cidade que o acolle. Percorreremos desde o pórtico exterior ata a cuberta do edificio na que está instalada de xeito permanente a obra Triangular Pavilion do artista Dan Graham.

Para participar nesta actividade non é preciso solicitar cita previa. As visitas partirán da recepción do CGAC ás 12:00 h e terán unha duración aproximada de 50 minutos. O grupo formarase por orde de chegada.

Visitas guiadas ás exposicións

Todos os domingos (excepto os que, por requirimentos de montaxe, non haxa exposicións), o público poderá achegarse ao CGAC para gozar das mostras expositivas acompañado por mediadoras especializadas en arte. Este servizo ten como finalidade estimular o interese pola creación artística contemporánea e facilitar a comunicación entre o espectador e as obras de arte. 

Para participar nesta actividade non é preciso solicitar cita previa. As visitas partirán da recepción do CGAC ás 12:00 h. As visitas terán unha duración aproximada de 50 minutos. 


Acceso á terraza 

Sábados e domingos ás 13:00 h

O público poderá solicitar na recepción do CGAC o acceso á terraza, onde está situada a instalación permanente do artista Dan Graham, Triangular Pavilion, 1997. O acceso ao espazo realizarase baixo a supervisión do persoal do centro. 


Todas as visitas son de balde

O número de prazas dispoñibles para participar nas actividades do CGAC poderá variar en función dos posibles cambios normativos relacionados coa COVID-19. 


Solicita unha visita guiada

Rúa Valle Inclán, 2
15703 Santiago de Compostela
España
Tel.: (+34) 981 546 619
cgac@xunta.gal