MIES É +. TALLERES EXPERIMENTAIS DE ARQUITECTURA CONTEMPORÁNEA 2024

O CGAC presenta a novena edición deste ciclo de talleres dedicado á arquitectura contemporánea e orientado ao público infantil.

Os talleres, que teñen lugar a última fin de semana de cada mes, desenvólvense baixo a dirección do arquitecto e educador Fermín Blanco co apoio do equipo didáctico do Sistema Lupo. O seu obxectivo é proporcionarlles aos nenos e nenas as ferramentas e as claves necesarias para interpretar a arquitectura do noso tempo a través das teorías, dos proxectos e dos traballos dos arquitectos e arquitectas máis importantes dos últimos tempos.

O Sistema Lupo aposta por unha didáctica activa, experimental, mestura de teoría e práctica, onde o xogo é o verdadeiro aglutinante dunha dinámica creativa de carácter cooperativo.

Os temas serán tratados transversalmente empregando a arquitectura como fío condutor. Valerémonos de diversas figuras da arquitectura e do urbanismo para introducírmonos en mundos creativos a través do seu pensamento.

O proxecto educativo baséase tanto na xeración de didácticas coma no deseño de recursos a partir de todo tipo de materiais (madeiras, membranas, escumas, arxilas, combinados sintéticos etc.) e exploracións no mundo inmaterial que permiten múltiples posibilidades combinatorias, formas, proporcións, xogos de equilibrio e estratexias de acción. A dinámica proposta fomenta a reflexión e a creatividade individual, así como o traballo en equipo a través do xogo e a construción a grande escala.

Nesta edición comezaremos traballando coa arquitectura de Álvaro Siza Vieira plasmada no propio CGAC. Para iso analizaremos as emocións e sensacións que desprenden os seus espazos e reflexionaremos verbo da súa integración na cidade. Continuaremos con espazos museísticos, desta volta centrándonos no traballo da parella de arquitectos Nieto e Sobejano, poñendo en relación a xeometría coa paisaxe e aprendendo de exemplos tan próximos como o Museo Interactivo da Historia en Lugo ou o futuro Museo de Pontevedra.

Como personaxe pioneiro salientaremos a Andrés Fernández-Albalat, pola súa contribución á modernidade galega, e faremos o noso propio laboratorio de formas. Tamén abordaremos os espazos públicos coa paisaxista Martha Schwartz e partiremos do seu traballo para facer os nosos experimentos de unión entre arte e paisaxe, tendo como base a comunidade e o medio ambiente. Como colofón, realizaremos un minipaseo de urbanismo activista da man das ideas da senlleira Jane Jacobs, para saber de que morren hoxe as nosas cidades.