FOTO FOLLETO DIM
FOTO FOLLETO DIM

MUSEOS POLA EDUCACIÓN E A INVESTIGACIÓN. SEMANA DOS MUSEOS 2024

13 Maio 2024 - 19 Maio 2024

O Consello Internacional de Museos (ICOM) propón para celebrar o Día Internacional dos Museos o lema “Museos pola educación e a investigación”.

Arredor deste evento, o CGAC programa unha semana de actividades gratuítas vinculadas á didáctica e á música contemporánea, á educación artística e á creación plástica, á performance e mais á historia da fotografía, alén dunha visita guiada aos recantos menos coñecidos do CGAC.

CONCERTOS DIDÁCTICOS

OUTRAS MÚSICAS SON POSIBLES

13 e 14 de maio

Comezamos a Semana dos Museos cun programa de cinco concertos didácticos a cargo de Ensemble Liberdade para diferentes públicos: catro concertos dirixidos ao público infantil e un concerto para o público adulto.

As sesións versarán sobre a escoita activa, as posibilidades ás que se enfronta a composición contemporánea e os procesos de xuízo por parte das persoas oíntes. Dunha maneira amena, práctica e participativa, artistas e oíntes penetraremos xuntos no marabilloso mundo das músicas posibles e formularémonos preguntas como: Que é música e que non o é? Por que nos gusta unha música e outra non? Onde está a música que eu necesito e como podo atopala? Hai músicas demasiado complexas? Hai músicas demasiado simples? Hai músicas boas e músicas malas?
 

Concertos didácticos para escolares

Luns 13 e martes 14 de maio | Horarios: de 10:30 a 11:30 h (primeira quenda) e de 12:00 a 13:00 h (segunda quenda) | Lugar: Auditorio do CGAC | Prazas: 250 por quenda | Entrada de balde, con inscrición previa

Persoas destinatarias: grupos de escolares de primeiro e segundo ciclo de educación primaria

Concerto didáctico para adultos

Martes 14 de maio | Horario: de 20:00 a 21:00 h | Lugar: Auditorio do CGAC | Prazas: 250 | Entrada libre ata completar a capacidade da sala

Persoas destinatarias: calquera persoa interesada na creación musical

 

TARDEO NO CGAC. TALLERES PARA PÚBLICO INFANTIL

Mércores 15 de maio | Horario: de 17:00 a 18:30 h | Lugar: Aula de Educación Artística | De balde, con inscrición previa

O mércores desta semana levaremos a cabo un taller para estimular o interese das persoas máis novas na creación artística contemporánea e incentivar a aprendizaxe a través da experimentación coa arte.

Nesta sesión didáctica e de lecer realizaremos actividades centradas nos procesos creativos de xeito individual e colectivo. Abordaremos tanto a plástica como a expresión corporal e a experimentación sonora. Crearemos con luces, con obxectos cotiáns, coa palabra e con elementos da natureza. Trataremos conceptos como o peso, o equilibrio, a escala, a repetición, a acumulación ou a asociación como estratexias creativas para achegarnos ás múltiples posibilidades de produción artística que existen na arte actual.

Persoas destinatarias: nenos e nenas de 4 a 6 anos

Prazo de inscrición: do 8 ao 14 de maio

Inscrición: As persoas interesadas poderán inscribirse, dentro do prazo establecido, a través cunha mensaxe electrónica dirixida a onlinecgac@gmail.com na que deberán indicar os seguintes datos: nome completo e idade de cada participante, número de teléfono e enderezo electrónico de contacto, nome e número de DNI das persoas autorizadas para recoller os e as menores no CGAC, e a data do taller ao que desexan asistir. Poderase inscribir un máximo de dúas persoas mediante cada solicitude. As prazas cubriranse por orde de inscrición. Cada solicitante recibirá unha notificación por correo electrónico a modo de resposta.

 

SESIÓN ABERTA DO CURSO DE FOTOGRAFÍA MEMORIAS DUNHA IMAXE LATENTE

Sesión: “A ruptura: o instante e a arte” | Mércores 15 de maio | Horario: de 19:00 a 20:30 h | Lugar: Auditorio do CGAC | Entrada libre ata completar a capacidade da sala | Dirixe: Fuco Reyes

Nesta Semana dos Museos, a sesión correspondente do curso de fotografía Memorias dunha imaxe latente estará aberta ao público.

Este curso propón unha deriva pola historia da fotografía desde o primeiro desexo de crear unha imaxe pola acción da luz ata o xurdimento das vangardas nos primeiros anos do século XX.

 

COLABORACIÓN COA V EDICIÓN DE PLATAFORMA FESTIVAL DE ARTES PERFORMATIVAS

18 e 19 de maio | Horario: 18:00 h | Entrada libre ata completar a capacidade das salas

O CGAC colabora un ano máis co festival de artes performativas Plataforma con dúas performances que terán lugar, ao longo da fin de semana, en diversos espazos da arquitectura de Álvaro Siza.

Strings, de Grace Schwindt, interpretada por Irina Ungureanu e Macarena Montesinos

Sábado 18 de maio | Lugar: antesala do auditorio do CGAC

Blob, de María Jerez, interpretada por María Jerez

Domingo 19 de maio | Lugar: Espazo de proxectos do CGAC

 

VISITA GUIADA O CGAC OCULTO

Domingo 19 de maio | Horario: de 12:00 a 12:50 h | De balde, sen inscrición previa

Para lle pór punto final á Semana dos Museos programamos unha visita especial aos espazos ocultos do CGAC.

O público interesado poderá coñecer os almacéns onde se custodian e conservan as obras de arte, os talleres de restauración e montaxe, a Aula de Educación Artística, as oficinas e a sala de xuntas. O percorrido rematará na cuberta do edificio, coroada pola instalación permanente do artista estadounidense Dan Graham, Triangular Pavilion.

Para participar nesta actividade non é preciso inscribirse previamente. A visita partirá da recepción do CGAC ás 12:00 h e terá unha duración aproximada de 50 minutos. O grupo formarase por orde de chegada.