O proxecto Entre-Vista nace como unha forma diferencial de pulsar a realidade da edición en clave creativa. Os seus obxectivos xerais son, entre outros: investigar o estado da cuestión do devandito tema a través dunha serie de entrevistas a algúns dos axentes máis activos e interesantes neste campo de coñecemento e de produción; repensar as potencialidades da área da edición como ámbito creativo e como espazo de actuación pública e política; propiciar unha reflexión sobre o status da información e a súa circulación en diferentes publicacións, cuxa difusión, malia ser reducida en termos cuantitativos, é cualitativamente moi relevante; e por último, propiciar un ámbito de debate e de estímulo para que a acción e a difusión neste campo aumenten tanto cuantitativa coma cualitativamente.