O Departamento de Actividades e Educación do CGAC desenvolve o seu programa cunha finalidade primordial: achegar a arte á sociedade a través da análise rigorosa de cuestións cruciais inherentes á actividade artística contemporánea.
Ciclos de cine e de conferencias, talleres, seminarios e concertos constitúen a oferta fundamental de actividades do centro, que procura involucrar un abano de público que oscila desde o sector profesional do mundo da arte e da cultura ata o cada vez máis numeroso colectivo de artistas e estudantes de belas artes e historia, sen esquecer a todas aquelas persoas interesadas na evolución da arte e a reflexión estética.
Ao mesmo tempo, o CGAC desenvolve programas específicos para centros educativos, así como un servizo de visitas guiadas, co propósito de dotar os distintos colectivos que se achegan ao museo das ferramentas necesarias para entender a arte actual e, por extensión, o mundo no que vivimos.
Se desexa recibir información sobre as actividades do CGAC, pode solicitalo enviando unha mensaxe aos seguintes enderezos electrónicos:
Este proxecto nace coa vocación de xerar, desde a arte contemporánea, un espazo de aprendizaxe, creación e motivación para menores en situación de hospitalización.
As aulas hospitalarias son servizos educativos que permiten ao alumnado infantil e xuvenil hospitalizado continuar a súa escolarización mentres está ingresado, ofrecéndolle acompañamento pedagóxico e emocional.
Poucos temas son tan transversais e están tan presentes na educación, a arte e a vida como a identidade. Por iso, nesta ocasión Arte na aula convídanos a reflexionar sobre aquilo que nos define, nos distingue e nos une, a coñecer referentes artísticos e a explorar a identidade a través de ferramentas plásticas.
O urbanismo e a arquitectura contemporánea seguen a ser os grandes descoñecidos da cidade de Santiago de Compostela. O obxectivo desta actividade é animar a cidadanía a ir máis alá da Compostela monumental para pasear, descubrir e gozar tamén dunha paisaxe arquitectónica actual e en constante cambio.
Nesta ocasión e, respondendo á demanda do público, reeditamos varias rutas de arquitectura realizadas nos últimos anos.
O obxectivo deste programa é fomentar e facilitar o diálogo entre o público e a arte contemporánea co ioga como ferramenta para a mediación.
Ao longo do ano levaremos a cabo unha serie de sesións de ioga que terán como marco e como inspiración as exposicións de artistas como Carlos Pazos, Lluís Hortalà, Alexandra Ranner ou Jannis Kounellis.
A través do movemento, a improvisación e a creación colectiva, neste laboratorio de danza de oito sesións cuestionaremos como habitamos os lugares cotiáns: edificios públicos, prazas, rúas, muros ou recantos esquecidos. Exploraremos os espazos deseñados por Álvaro Siza Vieira no CGAC e outras arquitecturas da cidade.
Nestas sesións didácticas, tanto presenciais coma en liña, realizaremos unha presentación con imaxes de diferentes obras de arte contemporáneas deténdonos na diversidade de soportes, materias, discursos, miradas e posibilidades expresivas e experimentais da arte actual. Ademais, durante a conversa, combinaremos a mostra de imaxes con dinámicas creativas dirixidas ao alumnado.
O CGAC ofrece visitas guiadas gratuítas ás súas exposicións temporais de martes a venres de 11:00 a 13:00 horas. Este servizo ten como finalidade estimular o interese pola creación artística contemporánea e facilitar a comunicación entre o espectador e as obras de arte.
O obxectivo desta actividade é achegar a arte contemporánea aos centros educativos e estimular o interese das novas xeracións pola creación artística do seu tempo.
O obxectivo desta actividade é estimular o interese dos máis pequenos pola creación artística contemporánea e que aprendan experimentando coa arte. Nestas sesións didácticas presenciais realizaremos unha presentación con imaxes de diferentes tipoloxías de museos contemporáneos.